Di Democratic Republic of Congo don start vaccine programme for Sunday against new Ebola outbreak wey don kill 28 pipo for di kontri since late August.
Di first batch of 400 doses of di vaccine don reach Bulape, one town for central Kasai province wey be di hotspot, na wetin World Health Organization (WHO) tok.
Di last time wey Ebola show face for dis big Central African kontri na three years ago, and e kill six pipo. But di worst one wey happen between 2018 and 2020 kill 2,300 pipo out of di 3,500 wey dem confirm say catch di virus.
As per di latest update from Congolese health authorities for Sunday, dem don record 28 deaths and 81 confirmed cases since di first infection wey dem see for one 34-year-old pregnant woman on August 20.
Di WHO believe say di fatality rate for dis outbreak wey dem declare for early September dey around 35%.
Di first set of vaccines dem give am to people wey dey most at risk, like health workers wey dey frontline and pipo wey don get close contact with di infected ones, na wetin WHO tok.
Dem don approve di delivery of another 45,000 vaccines to DRC, na wetin di United Nations health agency add.
Ebola first show face for DRC, wey dem dey call Zaire dat time, for 1976.
Di virus na deadly disease wey don kill about 15,000 pipo for Africa for di last 50 years. E dey spread through direct contact with body fluids.
Di disease dey cause serious bleeding and organ failure, and WHO don record fatality rates wey dey between 25% and 90% for di epidemics.
Scientists don identify six types of di Ebola virus, but dem believe say na di Zaire strain dey cause dis latest outbreak.
Even though vaccine dey for di Zaire strain, e no cover all di other strains.
