Nigeria anti-narcotics agency dey work with dia US and British counterparts to investigate where di $235 million cocaine shipment wey dem seize for Lagos Tincan Port come from. Dis na one of di biggest drug hauls wey don happen for di country.

National Drug Law Enforcement Agency (NDLEA) talk for statement on Tuesday say dem find 1,000 kilogrammes of cocaine inside one empty container for terminal over di weekend.

Terminal operators alert NDLEA and other port security agencies, and dem jointly examine di consignment.

Dem formally hand over di drugs to NDLEA on Tuesday after tests confirm say di substance na

cocaine

Nigeria vow say 'no stone go remain unturned'

US Drug Enforcement Administration (DEA) and UK National Crime Agency (NCA) join di investigation after Nigerian government invite dem.

"Di reason why we dey collaborate with our international partners for dis case na to make sure say we no leave any stone unturned... so that at the end we fit bring all di masterminds of dis huge consignment to book, wherever dem dey for di world," NDLEA Chairperson Buba Marwa talk.