Di man wey dem arrest for di killing of right-wing activist Charlie Kirk no wan cooperate wit authorities, but investigators dey try find di motive for di shooting as dem dey tok wit im friends and family, na wetin Utah Governor Spencer Cox yarn on Sunday.
Cox tok say di accused gunman, Tyler Robinson, wey be 22 years old, go face formal charges on Tuesday. For now, dem still dey hold am for custody inside Utah.
Investigators never fit join di pieces together to know why Robinson allegedly climb rooftop for Utah Valley University during one outdoor event come shoot Kirk for neck from far distance on Wednesday.
Di killing don bring new fear say political violence fit increase for di United States, as di gap between di left and di right dey widen.
Robinson never confess give investigators, Cox tok for di ABC programme "This Week."
"E no wan cooperate, but all di people wey dey around am dey cooperate, and I think say dat one dey very important," di Republican governor tok.
One person wey dey help investigators na Robinson roommate, wey also be im romantic partner, Cox tok, as e dey quote di FBI.
Investigators find messages wey dem engrave for four bullet casings, and di messages get references to memes and video game jokes. One affidavit wey authorities file for di case describe di messages.
One of di inscriptions, according to di affidavit, read: "hey fascist! CATCH!" followed by some directional arrows, wey look like reference to button sequence wey dey unleash bomb for Sony video game Helldivers 2.
'Leftist beliefs'
Cox, wey don dey praise for di way e dey beg Americans to calm down di toxic political wahala, tok for US networks on Sunday say investigators believe say Robinson dey follow leftist beliefs.
"E clear say di assassin get leftist ideology," Cox tok.
E tok say di information about Robinson, wey no dey cooperate, na wetin investigators hear from "people around am, like im family members and friends."
Cox tell CNN say dem still dey try figure out whether di gender identity of Robinson partner get anything to do wit di killing of Kirk.
Di identity of Robinson partner don vex some right-wing people.
