Erdogan say di situation for Gaza na 'complete genocide'

Turkish President Recep Tayyip Erdogan yarn say wetin Israel dey do for Gaza na "complete genocide" and e hold Israeli Prime Minister Benjamin Netanyahu responsible for di killings.

"I no think say we fit explain am any other way. Dis one na completely genocide. And na Netanyahu cause dis genocide. Netanyahu, without pity, don kill tens of thousands with dis genocide," Erdogan yarn for Fox News during di UN General Assembly for New York on Monday.

E still talk say over 120,000 people don wound for Gaza and say Türkiye don carry many of di injured people enter dia country for treatment.

"We dey totally against dis genocide," e add.

When dem ask am about di Palestinian resistance group Hamas and di hostages wey dem hold, Erdogan reject di claim say na only Hamas dey to blame.

"Dis no be crime wey dey one-sided. I think e go dey wrong to blame only Hamas for dis mata. At di same time, how we go ignore wetin Netanyahu don do?" e talk.

E accuse Israel say dem dey attack civilians anyhow, and e add: "When e reach weapons, Hamas no even fit compare with Israel. Israel dey use dia power without pity, from age 7 to 70, children, women, old people. Dem no get mercy. And na so dem dey kill people."

On di matter of how di conflict fit end, Erdogan no too believe say e go quick end. E compare am to di Russia-Ukraine war wey still dey go on: "You fit remember say (US President Donald Trump) talk say: 'I go end di Russia-Ukraine war.' E end? E still dey go on. Di same way, e talk say: 'I go end di war for Gaza.' E end am? No."

When dem ask am if e see Hamas as terrorist group, e reject di idea: "I no see Hamas as terrorist organisation. Instead, I see dem as resistance group... Dem dey use wetin dem get to defend demself."

Unity of Muslim world against Israel

Erdogan still meet Sheikh Sabah Khalid al-Sabah, crown prince of Kuwait, for di Turkish House (Turkevi Center) for New York, where e praise di unity of di Muslim world against Israel.

For di meeting wey dem hold for New York before di UN General Assembly, dem discuss di relationship between di two nations plus regional and global issues. Erdogan also talk say make dem continue di talks to achieve ceasefire for Gaza.

E talk about di importance of di relationship between Türkiye and Kuwait, especially for trade. E say both countries go continue to work together to strengthen cooperation.

On Syria, President Erdogan talk say make dem focus on rebuilding and development while dem still maintain di country's territorial integrity. E still confirm Ankara support for Syria.