Hamas 'dey behave well' under Gaza ceasefire deal: Kushner
Trump say di ceasefire for Gaza still dey hold, even though Israel don strike di area again and again.
Di son-in-law of US President Donald Trump, Jared Kushner, wey be one of di main pipo wey dey negotiate di Gaza ceasefire deal, don talk say di Palestinian group, Hamas, dey "act in good faith" under di agreement. E talk dis one based on di information wey dem get from regional mediators wey dey involved for di negotiations.
For one interview wey dem show for CBS on Sunday, Kushner talk say di US, Israel, and di mediators dey monitor how dem dey implement di deal. Dis one include di recovery of Israeli captives and di remains of pipo wey Hamas dey hold for Gaza.
When dem ask am whether Hamas dey honour di agreement, e talk say, "As we don see from wetin dem dey tell us through di mediators, dem dey try so far." E still add say, "E fit scatter anytime, but for now, we don see say dem dey try honour di agreement."
Kushner, wey dey serve as informal adviser to di Trump administration, talk say di US dey push both sides to find solution instead of dey blame each other for any wahala wey fit happen. E emphasise say di main goal na to maintain stability as di first phase of di ceasefire dey go on.
E still talk say di progress to recover di bodies of di hostages wey don die dey depend on how Israeli authorities and mediators from Qatar, Egypt, and Türkiye go fit work together. Na dem dey pass information give Hamas officials for Gaza.
Meanwhile, Trump don talk say di ceasefire for Gaza still dey hold, even though Israeli strikes don kill plenty pipo for di area. E emphasise say di US wan make sure say peace go continue dey between Israel and Hamas.
US Middle East Special Envoy, Steve Witkoff, talk say dem don already get "master plan" to rebuild Gaza after di war. E talk say di rebuilding go dey transparent and dem go involve Arab and international partners to lead di process.
For di interview wey e do for CBS, Witkoff talk say di plan go cost about $50 billion. E talk say, "E go cost plenty money. Di estimate na about $50 billion. E fit small pass or e fit big pass, but for dat region, no be too much money. Plenty governments go wan join hand."